串流音樂平台既興起慢慢改變咗香港樂迷聽歌既習慣，已經無咩聽眾會留意電視台既音樂節目。但係自從chill club推出之後，包括我在內既觀眾每個禮拜都會追看同重溫，究竟依個節目係點樣吸引一班好少睇電視聽歌既樂迷，成為近年最出色既音樂節目？嚟緊我想講吓我既睇法。
依個節目最好睇既地方就係佢只著重音樂，靠歌手唱既歌去吸引觀眾，唔會靠其他gimmick，每集都好似睇緊一個mini concert。比起其他音樂節目，歌手通常唱完自己首新歌，再做個簡單訪問就到下一個歌手，觀眾了解佢地既機會其實唔多。而chill club最好既地方就係歌手除咗佢地既新歌之外，會唱返一啲舊既作品，仲會同其他歌手或者主持合唱，一方面勾起觀眾對首歌既回憶甚至比佢地聽到新既版本，另一方面，一啲本來唔認識首歌甚至唔認識嗰位歌手既觀眾，都可以透過歌手現場既演繹了解更多。再加上viutv會放返佢地既演唱上Youtube，觀眾可以隨時重溫，可以話係跟上香港樂迷聽歌既習慣。
依個節目另一個吸引既位就係每集既歌手主持都會落埸唱歌。由初期既阿thor、羅敏莊、趙學而，到近期用嘉賓主持既形式，佢地會唱唔同年代、歌手、類型既歌曲，仲經常同嘉賓合唱。唔少聽眾都因為佢地既演繹，重新認識一啲舊既作品。而當中以阿thor既表演最令我著迷，佢沉穩既聲線再加上出色既唱功，令佢唱唔同歌手既作品都保留到自己既特色，同唔歌手合唱都可以一拍即合，可以話係樂壇既滄海遺珠。
再者，依個節目都做到每週音樂節目既重點,就係推廣新歌同新人。每個星期chill club都會有新歌推介既時段，再加上Chill Club 推介榜，令觀眾可以睇依個節目就知最近有咩新廣東歌，而且佢地好樂意請樂壇新人上去，慢慢變成香港樂迷聽新歌既平台。
比起TVB同時段既流行經典50年，由一開始搵唔同歌手唱啲舊歌，慢慢變咗一個綜藝節目，到依家甚至好似變咗籌款晚會既形式，每集都搵好多跟本唔太識唱歌既藝人上去表演，出嚟唱歌可能只係想宣傳自己既劇集，歌又唔好聽，畫面又唔好睇，家燕姐仲成日要親身上陣，節目既最後仲要嚟一個好老套既大合唱，真係睇到都覺得尷尬。而佢地當家既音樂節目勁歌金曲就搬到去深夜先播，請得最多既又係星夢旗下嗰幾個歌手，唱既往往都係劇集既主題曲，仲要搵一班無咩經驗、知名度又唔高既藝人嚟主持。可以睇得出TVB其實已經無心做好依個節目，真正想聽好歌既觀眾自然就唔會再睇。
總括而言,我希望chill club未來可以保留依家既班底同模式，邀請更多歌手合作，用音樂去留住觀眾，嚟緊佢地會舉辦第一屆既chill club頒獎禮，希望佢地可以真正表達到樂迷既意願，唔好步TVB勁歌頒獎禮既後塵，只係為咗比獎自己公司既歌手，要做到公平公正公開，相信樂迷都唔會有太大既不滿。
